andere länder, andere sitten..

die site werd met üsne idrück berricheret, wo für üs anderst, ungwohnt oder speziell send.

lüt, wo am bode legid

was für mich uh schräg gsi isch, wenn zmetzt am tag eifach persone uf de strasse glege send. in coban, guatemala isch eifach en uh alti frau binere steile strass met treppe am bode glege. mängisch han ich mich gfrogt, öb die person no lebt. dass han ich immer weder atroffe, dass eifach lüt am bode legid. speziellste wo ich gseh ha isch in léon, nicaragua gsi. bim trottoir rand heds es loch gha ond i dem loch hed eifach en bueb drin gschlofe. es isch morge am 8i gsi ond de verkehr scho aktiv. be öberrascht gsi, dass er no det gschlofe hed ond nonig vom lärm vo de passante ond verkehr verwachet isch.

armuet

was mer bi üs halt werklech ned könnt, send die vele bettler. wäg mer gsehnd locals immer, dass mer ned vo do send ond vo chend, bes fraue met chend, alti mönsche, jungi, eigetlech jedi altersklass hed üs scho um geld gfrogt. zum teil chömids zu üs ond fönd afo en gschecht verzehle, de weisch grad, dass er nor geld wot. in mexico isches scho trurig zum gseh, dass urbevölkerig höt eigetlech am schlechtiste dra isch ond am wenigste hed. mer send amigs im restaurant am esse gsi ond de chömid eifach chend, fraue oder alti fraue zu üs a tisch ond bettlid um geld. in belize hämer au so vel obdachlosi gseh. eigetlech i jedem land hämer armi lüt gseh, wo abfallsäck ufmöchid ond die am durchwühle send. immer weder gseh mer au lüt, wo völlig kapott usgsehnd, vom alkohl (vermuet ich mol) oder wo eifach am strasserand hockid ond völlig verwahrlost ond dreckig send. in panama heds erstunlich vel lüt gha, wo verrückt gsi send. panama city isch rächt fortschrittlich im verglich zu anderne länder in zentralamerika, deshalb heds mich überrascht, immer weder so vel „fous“ zgseh, sogar do in portobelo, es chlises verschlofnigs dorf a de karibik küste.

dumme tourist,-)

mi ma hed mer mol gseid, de dümmst mönsch of de welt isch de tourist. wo ich dass zerst ghört ha, hed mer dass ned so gfalle, wel ich jo jetzt au en touri be, aber er hed mer de erklärt, dass mer natürlich usgno gsehnd,-) mer send uf dass cho, wel zum teil als touri uh misstrauisch besch oder öber seid der wahrheit, aber du glaubsch ihm ned ond frogsch en anderi person gnau sgliche, obwohl der die erst person scho die info ge hed. isch of ei art au verständlich, wel immer sgfühl hesch, sie wänd dich drilege oder sie verlangid en zhöche pris, wels gsehnd, dass ned vo do besch oder wel mängisch en local öbis frogsch ond der jede en andere seich verzehlt. sie verzehlid mängisch lieber irgendöbis, als dass wördid säge, dass sies ned wössid.
has grad höt weder erlebt. mer send i de bäckerei gsi ond zwe franzose händ mega vel sandwich det kauft. verkäuferin hed ihne de pris gseid ond die zwe franzose händ uh lang under sich diskutiert, de pris nochegrechnet, überprüeft ond welle verstoh. sie seid ihne wahrheit, aber als touri glaubids ihre ned, dass met de ziit, wänds so lang am diskutiere send, fast scho lächerlich werd. mer send de gange ond die send immer no vor de theke gstande. es anders bispel vo cancun; en typ chond is hostel ine ond frogt, isch dass es hostel? isch wie wenn i nes resti ine gosch ond frogsch, öb dass es resti isch. nocher frogt er – es isch en jugendherberge gsi – öb sie dorms händ. wo ner de pris erfahre hed, hed er so reagiert, dass das vel zvel isch ond isch grad weder met siner fründin verschwonde. isch halt scho klar, dass amene touriort wie cancun, prise sogar für en jugendherberge höcher send als söst.

einisch hemer in san ignacio, belize en tour buecht. mer händ nor gwüsst, dass chle adventure  mässig werd si, inere höhli ine ond dass no so archäologische überrestene hed. schlussendlich semer nocheme 45 minute hike dür de wald vor de höhli gstande. nur heds i dere höhli wasser gha dh mer send die ganz zit im wasser gsi, swasser isch mega chalt gsi, mer händ zum teil müsse schwimme oder söst dörs wasser laufe. üse guide hed immer weder stopps gmacht ond sache verzehlt, wo üs gar ned so fest interessiert händ, mer händ nor denkt; red schnell, wel mer nor schnell weder händ use welle,-) de hämer au denkt, dumme tourist, zahlt vel geld für die tour, um nochher i de höhli umkracksle ond sich eine abfrühre.